علَي حيطان السجن يا سجان

أنا العشق مهداه الي عاشق مصر الدكتور عبد المنعم أبو الفتوح

رسمتك في عيون الناس

قصيده عشق من قلبي بغنّيها

رسمت عيونك الحلوين

قمرها اللي بيضوي في لياليها

وحبيتك

وحببت الجميع فيكي

وغنيتك

لحد ما حفظه العصافير أغانيكي

وصورتك

ووزعت الصور ع القمح ف الغيطان

ووصيت السنابل تعشق الأوطان

وخليت ناس

بتضحك لما بتشوفني

وتتّريق علي جناني

بقت دلوقتي عرفاني

وعشقوا لما عرفوا إن عشقي ليكي

شئ تاني

أنا اللي العشق خلاني

سكنت سجونك الضلمه

وسكن الليل ف عنواني

وكنت أصبر علي سجني وسجاني

ما دمتي بتيجي عز الليل تواسيني

أقول عاشقك

تقولي إن إنتي عشقاني

تخليني

أقوم آخد حيطان السجن بالأحضان

تخليني

أبوس قيدي

وأعشق قسوه القضبان

تخليني

أحس بإن أنا عصفور

وطاير في سماواتك

وأنا اللي ساجن السجان

وأنا اللي بعذب الكرباج

وأنا اللي بألم الأشواك

وأنا الساكن ف زنزانتهم الضلمه

لكني بنور الدنيا من الشباك

أنا عاشق

وطيفك لما بيجيني

وأنا بحلم

بشوفك فوق جبل عالي

وزي النجمه بتلالي

وأقول أطلع

يقول عقلي متقدرشي

وأنا بمشي

مدام القلب قال تقدر

ولا أفكر

وأشق الصخر بإديا

وأسمو زي ما حبك سما بيا

تشديني

ألاقي إديا ف إديكي

أنا العاشق

وصورتك قمره بتنور قناديلي

وبتجيلي



تناديلي

وأنا قاعد ف وسط العتمه بتذكر

وبتفكر

ف تبسيمه شفايفك


لما تتغندر

وبتعطر

بكفي لما تلمس كفك العنبر

يا أوطان عشقها سكر

أنا عاشق

وعمري ف يوم ما هتحول

دأنا اللي عشقتك الأول

وليه حطاني ف الآخر

وأنا اللي أرجع وأتاخر

وأنا اللي لما أقول عاشقك

بتتفسر وتتأول



دأنا اللي عشقتك الأول

أنا اللي كنت في أرضك

غلام ويا النبي موسي

خدوني الكهنه علي فرعون

وأنا اللي لسه ف اللفه

قالولي إزاي هتتخفي

هتخدم في بلاط القصر

وأنا اللي كنت بتمني

أكون في خدمتك يا مصر

ذلّوني

لحد ما بان شعاع النور

وقام موسي

يقلب ف القلوب البور

لقي قلب الحجر أرحم

كتير م الظالم المغرور

وراح فرعون

غرق ف اليم

وحطيتك ف شرياني

بدال الدم

ودعت النبي موسي

وحرستك لما من كتر الأمان

سموكي محروسه

ومن يومها

وأنا واقف علي البيبان

ولا إتقدرت

ولا يلزمني في حبك

أخدلي نيشان

أنا عاوزك
تبصي بس م الشباك

وتبتسمي

وأسمع فوق شفايفك دي

حروف إسمي

تقولي فنكوا يا ولادي

أقول يا مصر خدامك

لكن ألقي الجبان

يا مصر قدامك

وألاقيني ورا القضبان

أعاني يا مصر نسيانك

وأعاني قسوة السجان

أنا عايزك تثوري

ع اللي سرق العشق والأحلام

وشربنا الألام مواويل

وبكا علينا نهر النيل

وضيع جيل

وسكن في ضلام السجن

كل أصيل

وأنا م السجن بندهلك

أنا ناسك وأنا أهلك

وأنا صعبك وأنا سهلك

وأنا نوبك وأنا نابك

وشاوري بس يا غاليه

تلاقيني علي بابك

وخلي حد يتعدي

وأنا أوزن دمي بترابك

ممكن اموت

عاوز أقولك تسامحي

لا لتهويد القدس

لا لتهويد القدس

http://www.youtube.com/watch?v=9iomSAjX2gU

صعب جدا

صعب جدا

http://www.youtube.com/watch?v=G8eFA0_N8rY

ممكن أموت

هدلوقتي بس
ممكن أموت
ولإني مقدرتش أجيب الصبح لعيونك
وأغزلك ربيع أخضر
وأعطر قلبك الفياض
وأبوس إيدك
وأحلب من صدور الحزن
يوم عيدك
وأعيدك
شمس شموسه
وأهدي للوجود بوسه
وأخليكي صحيح وبجد محروسه
وأسطر ف الوجود مجدك
وأتسطر
لإن الوقت متأخر
فأنا آسف
لإني حلمت بالصبح اللي جاي يضحك
ف ليل داكن مفهش شموس
وكف الحلم كان ناعم
وكف الظلم كف كبوس
لإني وقفت في زمن القعاد والدوس
لإن الظلم فضاهم
وخلاهم جسد ناشف
مفهش نفوس
لإني نبحت صوتي ف ناس
بتّتاوب ومش هتقوم
لا بالظاهر ولا المحسوس
فأنا آسف
لإني زرعت أحلامي ف كف الليل
وانا فاكر بإني بحطّها ف الشمس
لإني صرخت ف الهيسه
وف المولد
فلا واصل صراخي صراخ
ولا واصل صراخي همس
عقرت حصاني
وربط القدم
حالف لجيب بكره
وأتاريني بجيب الأمس
لإني عشقت ترسيمه خدودك
يا اللي سكناني
وعشقك وأنتي عشقاني
ورسماني
علي خدود الشجر
فارس ولا الفرسان
وكان العشق ما بينا
صلاه إيمان
وكان اوقت وقت الصبح ما سافر
فقالوا عليا أنا كافر
أنا كافر
فطر بالكلمه
بعد الشمس ما سافرت
وبيجاهر
أنا ميّت وأستاهل
أدان العتمه بيأدّن ف نص الليل
وما بقومشي
يقوم الكل ويصلي
ويركع مش مهم لمين
وبيموتوا موطّين
لرب حزين
ولا سامع
ولا شايف
ولا غافر
وقالوا عليا أنا كافر
أنا كافر
رفضت أطوف
وأسعي بين جبال الخوف
وأشوف إبليس بيتعشّي بلد
ويحلي بالتانيه
وأشوف ناسي
ضهورها بتنكسر وتدوب
من التانيه
رجمت بقوتي إبليس
فرجموني
ورجموا الصبح ف عيوني
ويوم النحر
صلبوا الأرض بالمسامير علي قلبي
وصلبوني
وباب التوبه مفتوحلي
رفضت أتوب
وألبس توب مهوش توبي
وداب الحلم جوّايا
فقلت أسقي الوطن دوبي
يا جايبين الكفن خلّوه
وداروا وششكوا وإتغطّوا
ولا تغطّوش
علي جبين إترفع
ياللي إنتوا بتوطّوا
يا شايلين الجسد مدّوا
وودّوا للحبيب صورتي
ومكتوبي
وسمّوا عليا
ماتسمّوش
عليا الأرض بتسمّي
ومشتاق التراب دمّي
ونزف الدم بيزغرط
وبيغني
وتشرب زرعه الصبار
مواويلي
وترسمها علي عيون اللي هيجيلي
تشوف الصبح ف عيونهم
تمد جذورها تحضنّي وتحكيلي

ويجي اليوم
وتتعري البلاد للشمس
وتحبل صبح علي كيفك
تلف النجم ف رغيفك
وتدّيه للعيل تاكل
وع القمره العيال تجري
وتتسابق
وتتشاكل
وصبحك فل يا وطني

وصوتك ناي
وإن كان النهارده فات
فبكره جاي
وأنا يا صبح مكتوبلك
رساله عشق من قلبي
وأنا ماضي
وراضي
بس جيب للأرض عشاقها
وجيب للحلم عشاقه
وخلي ولادنا يشتاقوا
وقطّع للبلاد مناديل
من الظالم وأشلاءه

سفينتك راحه فين يا مصر

سفينتك
سفينتك راحه فين يا مصر
وليه يا مصر سكانها مسألوش السؤال دوَّه
مع إنك بتتمايلي وحواليكي متين نوََّه
وشعبك ف الشقا غرقان
وسمك القرش والحيتان
بيتقاسموا سوا دمه
وقبطانك ولا هامُّه
وبحاره خلاص هيوصلونا القاع
بنفس اللحن والإيقاع
ونغرض جوه سفينتنا ومش لاقيين فنار أو بر
وللقاع السفينه كلها بتنجر
ولما نضيع
ندوَّر ع اللى كان سايق
وكان سكران ومش فايق
بنلقاه فر
كدا بننضر
كدا كل الوطن بيروح
كدا لازم يسوقها نوح
كدا يا روح ما بعدك روح
وهسكت ليه وانا مدبوح
سكوتى جرم
على كل اللى خارم ف السفينه خرم
ويعلا والوطن نازل
ويتخن واحنا نتهازل
ويتاقل ويترازل
على الباذل كدا روحه فدا بوحه
وفين هوا
وسكان السفينه فين
وليه مغاروش كدا غاره
على اللى قاعدين على الطاره
وسايقين السفينه وهيا منداره
خلاص؟؟ خلاص مفيكيش كدا يا مصر بحاره؟؟!!!
يوروه الطريق لحسن مهوش شايف
وانا خايف
الاقي سفينتي غرقانه ف عتمة ليل
ف بحر الويل
ومتسلم صكوك بيعها لإسرائيل
سفينتك راحه فين يا نيل
يا ابو المدنى وابو التراتيل

ساره

الي كل ورده جميله
اقتطفتها يد الغدر

عرفت ازاي

عرفت ازاي

ضحيتي بمين

ضحيتي بمين

http://www.youtube.com/watch?v=bmgbjRukmPo

مين اللي عملك ازاز

يا جُرح شاقق قلبنا نصين
ومسرسب الدم اللى ف الشرايين
احنا انتهينا من سنين وانت
لسه بتقلق من دموع العين
يا جرح يا قافل بيبان بكره
ومحرم امبارح على الذكرهمين اللى عملك ازاز

ومحاصر الفكره ف قلب الجميع
ومخلى مية دمعنا عكره
متعكره بدمع الولاد الصغار
اللى خنقتوا فى عيونها النهار
لما عيوننا بتيجي فى عيونهم
بنحس معنى العجز والانكسار
ياللى اشتريتو عمرنا ببلاش
وهديتو بيه السفله والأوباش
روحنا معاكو فى طريق مجهول
توهنا وضيعنا ولسه مرجعناش
واحنا اللى غلطتنا بطول جرحنا
وبعرض امتنا اللى ضاع مننا
واحنا اللى لو فاتلين دموعنا حبال
من وحل غلطتنا ماهتشدنا
خايفين على عمرنا مع اننا ميتين
ومدفونين من سنين جوه وطنا الحزين
وريس الجبانات قاعد على عمرنا
خايف يقوم الرفات
خايف ياخدنا الحنين
عايز يورث قبورنا والمقام للغلام
نص البلاد للعيال ونصها للمدام
ولإن هذا الهم وريث لذاك الهمام
فهترجعى يا بلادى خطوتين للأمام
وانا يا بلادى بقولها بجد مش تريقه
انا وانتي متعلقين مع بعض ف المشنقه
الغدر جاى من ورا والكفر من قدام
وهتلقي فجأه عدوك فى ايديه الزمام
آن الآوان يا بلد نفوق ونصحا بقا
متقومي يا مؤمنه
إذا كنتى هتقومي
ليه الجبان غرقك
وانتى اللى بتعومي
متشدي حيلك كدا
وتعلميه الرضا
مش هوا يرتع ف خيرك وانتى بتصومى
يا مصر نفسي اشوف الضحكه على وشك
وتعرفى يا بلد مين اللى بيغشك
مين اللى عملك ازاز
وأضعفك بامتياز
قبل ما يجي العدو
يرميكي ويدشك

ضحيتي بمين

ضحِّيتي بمين علشان تعملي تاج راسك مين
وغدرتي بمين
علشان تعملى حراسك مين
يامُ البساتين كت حلوه ونِفسها تطرَح فضَّه ليوم الدين
راح فين الخير والنيل والطير وصلاح الدين
ضحِّيتي بمين
علشان تعملى تاج راسك مين
ضحيتي ب عود؟؟
مِن خير جنود؟؟
الحب ف قلبه ملُهش حدود
كان واقف لجل عينيكي السود
صايم وضميرك كان فاطر
سليمان خاطر
قلب ميعرفش يكون مسجون
ف بلاده وطايح فيها الدُون
قاموا قالوا عليه راجل مجنون
قَتَل المَخَاليق الشِّريرَه
اللى بيشربوا مَيِّة نيلنا
وبيصبوا ف مصارينا البيره
قاموا زعلوا الناس السَّكِيره
اللى عشان كاس
بيهِينُوا الناس
ويبيعوا الأُمَّه بتَعمِيرَه
لابسين لِعدَانا قميص النوم
وعلينا الشََّنَبَات العِيرَه
يا صباح مجروح
عزَّام هيروح للأهل
وهنا سليمان مدبوح
قَتَلُوه يَمَّه
صابِح مشنوق مِدَّلدِل فوق
والأُمه المِدَّلدِلَه من تحت
مِن كُتر المشي ف ضِل الحيطَه وكُتر الكَحت
سَلِّمت الرَّايه لواحد ندل و زىّ الشَّحط
عَمَّال بيهِينهَا وبياخُدهَا مِن فَحت ل فَحت
سليمان...
مجنون
والناس البايسين رِجل الكُون
هُمَّا العاقلين !!!!
ضَحِّيتي بمين
علشان تعملى تاج راسِك مين
ضَحِّيتي بأطفَالك ف جِنِين؟؟
وف غزَّه وقانا ودير ياسين؟؟
علشان تُحصُدى م الغدر سلام وتعيشي ف أوطانك آمنه؟؟
ضَحِّيتي ب عَسَلِك ونسيتي ان مَفِيش ف جِراب الموت سَمنَه
بُكره هتِتنازلي لآخِر عيِّل ف عِيالِك
ولآخِر شجره ف شجر الفُل
بُكره هتِتنازلي يا سِت الكُل
مَهُو عُمر حُقُوقنَا المَسلُوبَه
مَهتِرجَع لينا بكام طُوبه
ومقاومة ناس من حزب الله
مَهِى بردُو مَهِّياش محسُوبه
وانتوا الحَسِّيبَه اللَّعِّيبه
والنبى تُسكُتُوا وبلاش خِيبَه
دانتُوا بتظهَرُوا على أىّ شاشات
بنقول مَيَخُدكُوش ف مصيبه
وهنِيَّه يا ناس لمَّا بيظهر
بتعود السمس من الغيبه بالصدق الساطع ف عيونه ربنا
يحميه الله يصونه
بنحس ف صوته بعزتنا واننا عايشين
بنحس بصدق صلاح الدين وشرف منالوش ولا اى شريف
وسماحة وجه وقلب نضيف بيقود الأمه لمحو الزيف
وبتهتف بحياته الملايين
ضحيتي بمين علشان تعملى تاج راسك مين>

الصوره

الصوره
الصوره صورة مدينه
جُرحها فوَّاح
وعيون بتبكي حزينه دم ع اللى راح
صوَّر يا شاعر ودوَّر ع الكلام اللى يوجع
يمكن يفكَّر أخوك ويحن ليك يرجع
صوَّر جموعنا ودموعنا ودمِّنا و البُوم
وابعت بقا للحكومه نسخه م الألبوم
وابعت لأمة نبينا الغرقانين ف النوم
واسألها يا أمتي
لسه مجاش اليوم؟؟
لو كل ظالم ركب على ضهرك العريان
تديلو قوت العيال وتعمليه سلطان؟؟
تبقى إنتى لا أُمتى ولا تِبقيليش أوطان
إتنين وعشرين دوله ساكن فيها كام مليون
وإتنين وعشرين قصر ساكن قلبهم بدران
سايق عليهم كلاب القصر بالنبابيت
والأمه ملهاش عزا غير البُكا والصويت
متفوقى يا أُمه
لا هُمَّه هينهضوا بيكي
ولا هيسيبوكي تنهضي أصلا
هيدنهم راكبين على صدرك
لحد ما يحفروا قبرك
أو يِشلَحُو تُوبِك لكل جبان
يا أُمه تِعِب الزمان
مِن طول ما كتب الهزائم
الأوفيا ف السجون...
واللى ف وسط الولائم
والغنا والمجون
هوا الإمام والنِظام والحارس المأمون
يا أُمه فُوقِي الليله دي
صُبح بُكره جريح
هتقومي تِلقى الجبان مِسَلِّم المفاتيح
وفص ملح وداب
وسايبلك انتى العذاب
والموت ف قلب الشِباك
موت يا بلادي بصحيح
وانا يا بلادي الحبيبه من هنا بندهك
كَف النبي رَسَمِك
رَسم النبي كان جميل
اخترتى عَنُّه البديل
رَسَمِك
فقام شوَّهِك

زوِّد الحُراس
زوِّد الحُراس على قلب الصَبّيَه
كل ما تلاقيها جَّيه
واخنُق الضَّي ف عُيونها النرجسيه
عند ما تلاقيها ضيَّه
واشنق الكلمه على عِدان صمتنا
قول كما فرعون بأنك ربنا
لاحق الناس ف الشوارع
راقب الناس ف الجوامع
واشغل الناس بالطحين
اللى مسروق م الصوامع
انت مدَّمر وزايل
مهما راح تعمل عمايل
خوفك المزروع ف قلبك
هوه ده السيف اللى غالبك
والغلابه اللى حَنِيتها
لجل ما تشيّد قصورك
هيه دى الناس اللى هتقلع جدورك
والعصابه اللى انت قويتها
علي الناس الحزينه
هيَّه أول ناس هتهرب ف السفينه
بعد ما تفتح هاويس الميَّه على كل المدينه
واللى كانت خايفه من ظُلمك وساكته ومُستكينه
وقتها هتمد ايدها تغرَّقك فى دمعها
وقتها هتقول آمِنت
وانت سارق دم شعب وسايبه للجوع والضنا
وانت رامي ناس ف سجنك عدت العشرين سنه
وانت ساقي الحزن ناس ف ايديها اسباب الهنا
قول يا ظالم توبت مين راح يسمعك
خلى جيشك ف الساعه دى ينفعك
خلى هامان الجبان
بعد ما فاض الطوفان
للخدم والصولجان
ينقذك ويرجعك
انت رايح للى قلبك عمره ما حَنّ لكلامه
واللى معرفتش حلاله من حرامه
أكّليه يا ملايكه من طين الوطن
اللى فرَّط فيه وكان فيه مُؤتمن
واللى باعه للعادى بدون تمن
لا يا سمك القرش متاكلش الجبان
طلعو ع البر علشان الزمان
يجعله عِبره وآيه للى باع وطنه وخان
والنهارده تعلن التوبه النهارده ولا مستني الطوفان
ليه مُصِر تتوب يا ظالم بعد ما يفوت الأوان
فوق لنفسك النهارده فرصتك
خد بإيد الناس دى وانقذ أمتك