زوِّد الحُراس
زوِّد الحُراس على قلب الصَبّيَه
كل ما تلاقيها جَّيه
واخنُق الضَّي ف عُيونها النرجسيه
عند ما تلاقيها ضيَّه
واشنق الكلمه على عِدان صمتنا
قول كما فرعون بأنك ربنا
لاحق الناس ف الشوارع
راقب الناس ف الجوامع
واشغل الناس بالطحين
اللى مسروق م الصوامع
انت مدَّمر وزايل
مهما راح تعمل عمايل
خوفك المزروع ف قلبك
هوه ده السيف اللى غالبك
والغلابه اللى حَنِيتها
لجل ما تشيّد قصورك
هيه دى الناس اللى هتقلع جدورك
والعصابه اللى انت قويتها
علي الناس الحزينه
هيَّه أول ناس هتهرب ف السفينه
بعد ما تفتح هاويس الميَّه على كل المدينه
واللى كانت خايفه من ظُلمك وساكته ومُستكينه
وقتها هتمد ايدها تغرَّقك فى دمعها
وقتها هتقول آمِنت
وانت سارق دم شعب وسايبه للجوع والضنا
وانت رامي ناس ف سجنك عدت العشرين سنه
وانت ساقي الحزن ناس ف ايديها اسباب الهنا
قول يا ظالم توبت مين راح يسمعك
خلى جيشك ف الساعه دى ينفعك
خلى هامان الجبان
بعد ما فاض الطوفان
للخدم والصولجان
ينقذك ويرجعك
انت رايح للى قلبك عمره ما حَنّ لكلامه
واللى معرفتش حلاله من حرامه
أكّليه يا ملايكه من طين الوطن
اللى فرَّط فيه وكان فيه مُؤتمن
واللى باعه للعادى بدون تمن
لا يا سمك القرش متاكلش الجبان
طلعو ع البر علشان الزمان
يجعله عِبره وآيه للى باع وطنه وخان
والنهارده تعلن التوبه النهارده ولا مستني الطوفان
ليه مُصِر تتوب يا ظالم بعد ما يفوت الأوان
فوق لنفسك النهارده فرصتك
خد بإيد الناس دى وانقذ أمتك