يا جُرح شاقق قلبنا نصين
ومسرسب الدم اللى ف الشرايين
احنا انتهينا من سنين وانت
لسه بتقلق من دموع العين
يا جرح يا قافل بيبان بكره
ومحرم امبارح على الذكرهمين اللى عملك ازاز
ومحاصر الفكره ف قلب الجميع
ومخلى مية دمعنا عكره
متعكره بدمع الولاد الصغار
اللى خنقتوا فى عيونها النهار
لما عيوننا بتيجي فى عيونهم
بنحس معنى العجز والانكسار
ياللى اشتريتو عمرنا ببلاش
وهديتو بيه السفله والأوباش
روحنا معاكو فى طريق مجهول
توهنا وضيعنا ولسه مرجعناش
واحنا اللى غلطتنا بطول جرحنا
وبعرض امتنا اللى ضاع مننا
واحنا اللى لو فاتلين دموعنا حبال
من وحل غلطتنا ماهتشدنا
خايفين على عمرنا مع اننا ميتين
ومدفونين من سنين جوه وطنا الحزين
وريس الجبانات قاعد على عمرنا
خايف يقوم الرفات
خايف ياخدنا الحنين
عايز يورث قبورنا والمقام للغلام
نص البلاد للعيال ونصها للمدام
ولإن هذا الهم وريث لذاك الهمام
فهترجعى يا بلادى خطوتين للأمام
وانا يا بلادى بقولها بجد مش تريقه
انا وانتي متعلقين مع بعض ف المشنقه
الغدر جاى من ورا والكفر من قدام
وهتلقي فجأه عدوك فى ايديه الزمام
آن الآوان يا بلد نفوق ونصحا بقا
متقومي يا مؤمنه
إذا كنتى هتقومي
ليه الجبان غرقك
وانتى اللى بتعومي
متشدي حيلك كدا
وتعلميه الرضا
مش هوا يرتع ف خيرك وانتى بتصومى
يا مصر نفسي اشوف الضحكه على وشك
وتعرفى يا بلد مين اللى بيغشك
مين اللى عملك ازاز
وأضعفك بامتياز
قبل ما يجي العدو
يرميكي ويدشك
الاشتراك في:
تعليقات الرسالة (Atom)
ليست هناك تعليقات:
إرسال تعليق