ممكن أموت

هدلوقتي بس
ممكن أموت
ولإني مقدرتش أجيب الصبح لعيونك
وأغزلك ربيع أخضر
وأعطر قلبك الفياض
وأبوس إيدك
وأحلب من صدور الحزن
يوم عيدك
وأعيدك
شمس شموسه
وأهدي للوجود بوسه
وأخليكي صحيح وبجد محروسه
وأسطر ف الوجود مجدك
وأتسطر
لإن الوقت متأخر
فأنا آسف
لإني حلمت بالصبح اللي جاي يضحك
ف ليل داكن مفهش شموس
وكف الحلم كان ناعم
وكف الظلم كف كبوس
لإني وقفت في زمن القعاد والدوس
لإن الظلم فضاهم
وخلاهم جسد ناشف
مفهش نفوس
لإني نبحت صوتي ف ناس
بتّتاوب ومش هتقوم
لا بالظاهر ولا المحسوس
فأنا آسف
لإني زرعت أحلامي ف كف الليل
وانا فاكر بإني بحطّها ف الشمس
لإني صرخت ف الهيسه
وف المولد
فلا واصل صراخي صراخ
ولا واصل صراخي همس
عقرت حصاني
وربط القدم
حالف لجيب بكره
وأتاريني بجيب الأمس
لإني عشقت ترسيمه خدودك
يا اللي سكناني
وعشقك وأنتي عشقاني
ورسماني
علي خدود الشجر
فارس ولا الفرسان
وكان العشق ما بينا
صلاه إيمان
وكان اوقت وقت الصبح ما سافر
فقالوا عليا أنا كافر
أنا كافر
فطر بالكلمه
بعد الشمس ما سافرت
وبيجاهر
أنا ميّت وأستاهل
أدان العتمه بيأدّن ف نص الليل
وما بقومشي
يقوم الكل ويصلي
ويركع مش مهم لمين
وبيموتوا موطّين
لرب حزين
ولا سامع
ولا شايف
ولا غافر
وقالوا عليا أنا كافر
أنا كافر
رفضت أطوف
وأسعي بين جبال الخوف
وأشوف إبليس بيتعشّي بلد
ويحلي بالتانيه
وأشوف ناسي
ضهورها بتنكسر وتدوب
من التانيه
رجمت بقوتي إبليس
فرجموني
ورجموا الصبح ف عيوني
ويوم النحر
صلبوا الأرض بالمسامير علي قلبي
وصلبوني
وباب التوبه مفتوحلي
رفضت أتوب
وألبس توب مهوش توبي
وداب الحلم جوّايا
فقلت أسقي الوطن دوبي
يا جايبين الكفن خلّوه
وداروا وششكوا وإتغطّوا
ولا تغطّوش
علي جبين إترفع
ياللي إنتوا بتوطّوا
يا شايلين الجسد مدّوا
وودّوا للحبيب صورتي
ومكتوبي
وسمّوا عليا
ماتسمّوش
عليا الأرض بتسمّي
ومشتاق التراب دمّي
ونزف الدم بيزغرط
وبيغني
وتشرب زرعه الصبار
مواويلي
وترسمها علي عيون اللي هيجيلي
تشوف الصبح ف عيونهم
تمد جذورها تحضنّي وتحكيلي

ويجي اليوم
وتتعري البلاد للشمس
وتحبل صبح علي كيفك
تلف النجم ف رغيفك
وتدّيه للعيل تاكل
وع القمره العيال تجري
وتتسابق
وتتشاكل
وصبحك فل يا وطني

وصوتك ناي
وإن كان النهارده فات
فبكره جاي
وأنا يا صبح مكتوبلك
رساله عشق من قلبي
وأنا ماضي
وراضي
بس جيب للأرض عشاقها
وجيب للحلم عشاقه
وخلي ولادنا يشتاقوا
وقطّع للبلاد مناديل
من الظالم وأشلاءه